12ஆம் வகுப்பு மாணவர்களுக்கு வந்த முக்கிய அப்டேட்... இ-மெயில் ரெடியா? பள்ளிக்கல்வித் துறை உத்தரவு!
தமிழக முதலமைச்சர் மு.க.ஸ்டாலின் தொடங்கி வைத்துள்ள ”நான் முதல்வன்” திட்டம் 12ஆம் வகுப்பு முடித்து விட்டு வெளியே வரும் மாணவர்களுக்கு பெரிதும் உதவிகரமாக இருந்து வருகிறது. உயர்கல்விக்கான வழிகாட்டுதல்கள் சிறப்பு குழுவின் மூலம் அளிக்கப்பட்டு வருகின்றன.
இந்த திட்டம் சார்ந்த 2023-24ஆம் கல்வியாண்டில் உயர்கல்வி கல்லூரி சேர்க்கைக்கு அனைத்து விண்ணப்பங்களும் இணையதளம் மூலம் மட்டுமே விண்ணப்பிக்க முடியும். அப்படி விண்ணப்பிக்கும் போது பெரும்பாலான கல்லூரிகள், சேர்க்கை தொடர்பான தகவல்களை மின்னஞ்சல், அதாவது இ-மெயில் மூலம் வாயிலாக மாணவர்களுக்கு வழங்குகின்றன.

எனவே ஒவ்வொரு மாணவருக்கும் இ-மெயில் முகவரி என்பது கட்டாயமான ஒன்றாக இருக்கிறது. எனவே தற்போது 12ஆம் வகுப்பு பயிலும் ஒவ்வொரு மாணவரும் அவர்களாகவே இ-மெயில் முகவரியை உருவாக்கிட வகுப்பு ஆசிரியர்கள் வழிகாட்ட வேண்டும்.

எமிஸ் தளத்தில் பதிவேற்றம்
இதை மேற்பார்வை செய்து அனைத்து அரசு மேல்நிலைப் பள்ளி தலைமை ஆசிரியர்களும் உறுதி செய்ய வேண்டும். இந்த இ-மெயில் முகவரியை EMIS தளத்தில் மாணவர் தகவல் பதிவேட்டில் பதிவேற்ற வேண்டும்.
பள்ளிகளில் உள்ள பயிற்சி பெற்ற ஆசிரியர்களை இணைத்து ஏற்கனவே உருவாக்கப்பட்ட வாட்ஸ்-அப் குழுவில் பகிர்ந்து, அவர்களிடம் இருந்து அறிக்கை பெற்று அனுப்ப வேண்டும். இவ்வாறு நடப்பதை அனைத்து மாவட்ட முதன்மை கல்வி அலுவலர்கள் உறுதி செய்ய வேண்டும் என்று கேட்டுக் கொள்ளப்பட்டுள்ளது.