என்றென்றும் அண்ணா.. ஸ்பெயின் நாட்டில் அண்ணா படத்துக்கு மரியாதை செலுத்திய முதல்வர் ஸ்டாலின்!
மேட்ரிட்: ஸ்பெயின் சுற்றுப்பயணம் மேற்கொண்டுள்ள தமிழக முதல்வர் ஸ்டாலின், அண்ணா நினைவுநாளையொட்டி அவரது திருவுருவ படத்திற்கு மரியாதை செலுத்தியுள்ளார்.
தமிழ்நாட்டின் முன்னாள் முதலமைச்சரும், திமுக தலைவருமான சி.என்.அண்ணாதுரையின் நினைவு நாள் இன்று அனுசரிக்கப்படுகிறது. நவீன தமிழ்நாட்டின் சிற்பி என்றழைக்கப்படும் பேரறிஞர் அண்ணா, அவர் மறைந்து அரை நூற்றாண்டு காலம் கடந்த பின்னும், இன்றைய அரசியலின் முகமாக இருந்து வருகிறார்.
பேரறிஞர் அண்ணாவின் நினைவு தினத்தன்று ஆண்டு தோறும் சென்னையில் திமுக அமைதி பேரணியை நடத்தி வருகிறது. இந்நிலையில், இந்த ஆண்டும் அண்ணாவின் 55வது நினைவு தினமான இன்று திமுக சார்பில் அமைதிப் பேரணி, திமுக பொதுச் செயலாளர் துரைமுருகன் தலைமையில் நடைபெற்றது.
